Tanınmış jurnalist Cavanşir Feyziyevə görə istefa verdi
Polemika
Tanınmış jurnalist Cavanşir Feyziyevə görə istefa verdi
Tanınmış jurnalist Mətbuat Şurasının sədri Əflatun Amaşova müraciət edib.
Polemika.az xəbər verir ki, jurnalist müraciətində Mətbuat Şurasının İdarə Heyətinin üzlüyündən istefa verdiyini açıqlayıb. Buna səbəb ki, Milli Məclisin deputatı Cavanşir Feyziyevin dünən bir qrup jurnalisti təhqir etməsini göstərib. Bahəddin Həzi onu və həmkarlarını təhqir edən deputatla birgə Mətbuat Şurası İdarə Heyətinin üzvü olmaq istəmədiyini qeyd edib.
Xatırladaq ki, deputat Cavanşir Feyziyev Mətbuat Şurası İdarə Heyətinin üzvüdür.
Bahəddin Həzinin müraciətini olduğu kimi təqdim edirik:
"2018-ci il martın 10-da Azərbaycan Jurnalistlərinin VII qurultayında gözləmədiyim halda Mətbuat Şurasının İdarə Heyətinə üzv seçildim. "Gözləmədiyim halda" ifadəsini ona görə işlədirəm ki, ərkim çatan redaksiyalara mənim namizədliyimi irəli sürməməyi xahiş etmişdim. Ancaq buna baxmayaraq, namizədliyimi vermişdilər. O zamandan keçən dörd ilə yaxın müddətin yarısı pandemiya dövrünə düşdü. Normal vaxtlarda isə medianın, jurnalistlərin hüquqlarını və qanuni mənafelərini qorumaq üçün əlimdən gələni etmişəm. Daha çox iş görə bilərdim. Obyektiv və subyektiv səbəblərdən buna imkanım olmadı.
Ancaq qərara gəlmişəm ki, Mətbuat Şurasının İdarə Heyətinin üzvlüyündən istefa verəm. Buna səbəb fevralın 4-də Milli Məclisin deputatı Cavanşir Feyziyevin feysbuk sosial şəbəkə platformasındakı özünə məxsus səhifəsində Azərbaycan jurnalistlərinin, o cümlədən, mənim haqqımda böhtan və təhqir dolu status paylaşması, mən də daxil olmaqla xeyli sayda jurnalisti təhqir etməsi və bir sıra ağır cinayətlərdə ittiham etməsi olub. Eyni zamanda Cavanşir Feyziyev də Mətbuat Şurası İdarə Heyətinin üzvüdür. Belə bir adamla eyni qurumda təmsil olunmaq istəmirəm. Buna görə də Azərbaycan Mətbuat Şurasın İdarə Heyətində fəaliyyətimi dayandıraraq üzvlükdən çıxdığımı bəyan edirəm.
Fəaliyyətim dövründə Azərbaycan mediasının müdafiəsi və inkişafı üçün edə bilmədiklərimə görə jurnalist həmkarlarımdan üzr istəyirəm. Mətbuat Şurasında təmsil olunan həmkarlarıma isə uğurlar arzulayıram!
Hörmətlə;
Bahəddin Həziyev
05 fevral 2022-ci il
Həftənin birinci günü bu ərizə Mətbuat Şurasına göndəriləcək. Ancaq mən düşünürəm ki, eyni zamanda Cavanşir Feyziyevin Mətbuat Şurası İdarə Heyətində qalıb-qalmaması məsələsi müzakirəyə çıxarılmalıdır".
