Meşələrin qorunmasına 12 milyard dollardan çox vəsait ayrılacaq
Polemika
Meşələrin qorunmasına 12 milyard dollardan çox vəsait ayrılacaq
Beynəlxalq birlik meşələrin qorunması üçün mübarizəyə 12 milyard dollardan çox vəsait ayıracaq.
Polemika.az "Theins"ə istinadla xəbər verir ki, bunu Böyük Britaniyanın Baş naziri Boris Conson Qlazqoda keçirilən iqlim sammitində çıxışı zamanı deyib.
O bildirib: “Mən bu sammitdə elan etməkdən məmnunam ki, dünya dövlətləri Mərkəzi Afrika meşələrinin və qiymətli ekosistemlərinin qorunmasına kömək etmək üçün növbəti 5 ildə ən azı 1,5 milyard dollar ayırmaq üçün birgə işləyirlər. Bu, 12 milyard dollardan çox yeni qlobal maliyyə öhdəliyinin yalnız bir hissəsidir. Həmçinin, tarixdə meşələr və iqlim tədbirləri üçün ictimai fondlara ən böyük kollektiv öhdəlikdir".
Consonun sözlərinə görə, temperatur artımını 1,5 dərəcə Selsi səviyyəsində saxlamaq məqsədinə nail olmaq üçün meşələrin qorunması əsas şərtdir:
"Biz iqlim dəyişikliyinə diqqət yetirmədən yaşayış mühitinin və növlərin dağıdıcı itkisinin öhdəsindən gələ bilmərik".
Xatırladaq ki, Qlazqoda BMT-nin İqlim Dəyişikliyi üzrə Çərçivə Konvensiyası Tərəflərinin 26-cı Konfransı öz işinə başlayıb.
Zirvədə 100-dən çox dövlət və hökumət başçısı iştirak edir.
Konfrans iştirakçılarının qlobal istiləşmə ilə mübarizədə daha sərt öhdəliklər götürəcəkləri gözlənilir. G20 sammiti qrupa daxil olan ölkələrin liderlərinin ümidlərini doğrultmayıb.
Danışıqlar nəticəsində G20-nin nümayəndələri XXI əsrin ortalarına qədər “qlobal karbon neytrallığına” nail olmaq və kömür enerjisinin xaricdə dövlət tərəfindən maliyyələşdirilməsini dayandırmaq barədə razılığa gəliblər.
Eyni zamanda, sənəddə “XXI əsrin ortaları” tarix göstərilmir və ölkələr daxilində karbon enerjisindən imtina hədəfləri heç bir şəkildə təsvir olunmur.
Əsasən, qrup liderlərinin kommünikesi 2015-ci il Paris İqlim Müqaviləsi ilə səsləşir.
