Məhkəmə qardaşını öldürən şəxsə baraət verdi - Prokurorluq şikayət etdi
Polemika
Məhkəmə qardaşını öldürən şəxsə baraət verdi - Prokurorluq şikayət etdi
Prokurorluq Bakıda ailə münaqişəsi zamanı baş verən qətllə bağlı məlumat yayıb.
Polemika.az-ın xəbərinə görə, məlumatda deyilir:
Bəzi media və sosial şəbəkə səhifələrində paytaxtın Nəsimi rayonunda Camalov Etibar Feyzəməd oğlunu qəsdən öldürməkdə təqsirləndirilən qardaşı Elçin Camalovun barəsində Bakı Ağır Cinayətlər Məhkəməsində bəraət verilməsi ilə bağlı informasiyalar yayılmışdır.
Xəbər verildiyi kimi, martın 18-də birgə yaşadıqları evdə aralarında şəxsi münasibətlər zəminində baş vermiş mübahisə zamanı Etibar Camalov bıçaqla qardaşı Elçin Camalova xəsarət yetirmiş, daha sonra sonuncu bundan qəzəblənərək qisas almaq niyyəti ilə evdə masanın üzərində olan bıçağı götürüb Etibar Camalovun bədəninin müxtəlif nahiyələrinə xəsarətlər yetirərək onu qəsdən öldürmüşdür.
Faktla bağla Cinayət Məcəlləsinin 120.1-ci (qəsdən adam öldürmə) maddəsi ilə Nəsimi rayon prokurorluğunda cinayət işi başlanaraq istintaq aparılmış, Elçin Camalova qeyd edilən maddə ilə ittiham elan edilərək cinayət işi baxılması üçün Bakı Ağır Cinayətlər Məhkəməsinə göndərilmişdir.
Bakı Ağır Cinayətlər Məhkəməsinin 08 dekabr 2021-ci il tarixli hökmü ilə təqsirləndirilən şəxs Elçin Camalovun əməli “zəruri müdafiə” kimi qiymətləndirilərək ona bəraət verilmişdir.
Məhkəmənin gəldiyi nəticənin işin faktiki hallarına uyğun olmaması və cinayət qanununun normasının düzgün tətbiq edilməməsi əsası ilə dövlət ittihamçısı tərəfindən həmin hökmdən Bakı Apellyasiya Məhkəməsinə apellyasiya protesti verilmişdir.
