Səudiyyə öz ballistik raketini hazırlayır - CNN
Polemika
Səudiyyə öz ballistik raketini hazırlayır - CNN
Səudiyyə Ərəbistanı Çinin köməyi ilə ballistik raketlərin istehsalı ilə fəal məşğul olur.
Polemika.az CNN-ə istinadla xəbər verir ki, bunu ABŞ kəşfiyyat rəsmiləri bildirib.
Peyk görüntüləri səudiyyəlilərin Çindən silah almaq əvəzinə istehsal etdiklərini sübut edir. Görüntülərdə Səudiyyə Ərəbistanının raket zavodu və təlim poliqonu əks olunub.
"Səudiyyə Ərəbistanının ballistik raketlərin yerli istehsalı onu göstərir ki, raketlərin yayılmasına nəzarət etmək üçün istənilən diplomatik səy öz ballistik raketlərini istehsal edən Səudiyyə Ərəbistanı və İsrail kimi digər regional oyunçuların da iştirakını tələb edəcək", - deyə silah eksperti Ceffri Lüis qeyd edib.
Çinin texniki yardımı ilə Səudiyyə Ərəbistanının raket proqramı ABŞ prezidenti Co Bayden administrasiyasının Pekinlə münasibətləri pozmaq cəhdlərinə də təsir edə bilər.
Çin Xarici İşlər Nazirliyinin sözçüsü CNN-ə verdiyi açıqlamada qeyd edib ki, belə əməkdaşlıq heç bir beynəlxalq hüquq normalarını pozmur və kütləvi qırğın silahlarının yayılması ilə bağlı deyil.
ABŞ keçmiş administrasiyası Səudiyyə Ərəbistanının raket proqramından xəbərdar idi. Trampın dövründə Birləşmiş Ştatlar səssiz razılıq verib.
Karnegi Beynəlxalq Sülh Fondunun nüvə siyasəti və silahlar üzrə eksperti Ankit Panda bildirib: “Normalda ABŞ Səudiyyə Ərəbistanına bu imkanlardan istifadə etməməsi üçün təzyiq edərdi, lakin səudiyyəlilərin bu imkanlardan yararlanmasının ilk əlamətləri Tramp dövründə öz iradələri ilə ortaya çıxıb. Tramp administrasiyası, yumşaq desək, bu məsələlərdə Ər-Riyada təzyiq göstərməkdə maraqlı deyildi”.
