Xuramandan 8 Mart mesajı: "Bu bayramı özəl qeyd etmirəm"
Polemika
Xuramandan 8 Mart mesajı: "Bu bayramı özəl qeyd etmirəm"
8 Mart - Beynəlxalq Qadınlar Günü. Bu bayram bir çoxları üçün adi gün, bəziləri üçün isə “sınaq dövrü”dür. Yarızarafat-yarıciddi bu günü “kişilərin qara bayramı” adlandıranlar da az deyil.
Bir neçə gün öncə müğənni Nura Surinin sosial şəbəkədə bayramlarda yazılan şablon ismarıclara üsyan etməsi, “quru təbrik” istəmədiyini deməsi müzakirələrə səbəb oldu. İfaçının “Kişilər 1 dəstə gül belə qıymırsa, adi mesajla şəxsən məni təbrik etməsin”- deməsi ilə onu tənqid edənlər də ortaya çıxdı.
Bəs görəsən, bayram günü hədiyyə verilməsi mütləqdirmi?
Mövzu ilə bağlı Polemika.az-a danışan müğənni Xuraman Şuşalı qeyd edib ki, hədiyyənin bahalısı, ucuzu olmaz. Səmimi, ürəkdən, sevgi ilə verilən kiçik bir hədiyyə, göstərişlə verilən bahalıdan qat-qat dəyərli və qiymətlidir:
“Dəliyə gündə bayramdır (gülür). Mən bu bayramı o qədər də özəl qeyd etmirəm, amma dövlətimizdə rəsmi olaraq bayram günü sayıldığına görə, hamı kimi mən də qeyd edirəm. Kimsə hədiyyə versə, əlbəttə ki, qəbul edəcəyik. Özümüz də müəllimlərə, yaxınlara hədiyyə edəcəyik. Hədiyyə vermək də, almaq da gözəldir. Hədiyyə bir insanın könlünü alır, sevindirir. Hədiyyənin böyüyü, kiçiyi olmaz. Bu fərq etməz, əsas olan diqqətdir deyə düşünürəm. Burda nə var ki? Olan yerdə hədiyyə vermək olar, olmasa da qarşı tərəfi anlamaq olar”.
Əsmətxanım
