"Qarabağ" Azərbaycanı UEFA reytinqində yüksəldə biləcəkmi?
Polemika
"Qarabağ" Azərbaycanı UEFA reytinqində yüksəldə biləcəkmi?
Azərbaycan UEFA reytinqində yeni rekordun astanasındadır.
Polemika.az xəbər verir ki, bu rekordun gerçəkləşməsi “Qarabağ”dan asılıdır.
Kipr “Omoniya”sı ilə üz-üzə gələcək Ağdam klubunun qələbəsi ölkəmiz üçün mütləq rekordla əlamətdar olacaq. Söhbət bir il ərzində toplanılan UEFA əmsalından gedir.
Azərbaycan bu mövsüm 4,125 xal qazanıb. Bu, futbol tariximizdə 4-cü nəticədir.
Rekord isə 4,375-ə bərabərdir. Həmin göstəriciyə 2015/16 mövsümündə təsadüf olunub. İki il sonra rekord təkrarlanıb. Bu mövsümlərin arasındakı 2016/17-də isə 4,250 – yəni tariximizin üçüncü nəticəsi qeydə alınıb.
Konfrans Liqasının qrup mərhələsinin V turunun bugünkü görüşü rekord vəd edir. “Qarabağ” qalib gəlsə, əmsalımız 0,500 xal artacaq. Bu, o deməkdir ki, 4,625 xal topladığımız mövsüm tariximizin ən uğurlusu olacaq.
2015/16 və 2017/18 mövsümlərindəki rekordun təkrarlanması üçün təmsilçimiz uduzmamalıdır. Heç-heçə reytinqimizə 0,250 xal gətirəcək.
Qrup mərhələsində daha bir oyunu qalan və ən azı pley-offda 2 matç keçirəcəyi dəqiq olan “Qarabağ” bu gün yenilənəcək rekordu daha yüksək həddə çatdırmaq imkanına da malikdir. Bu gün rəsmiləşəcək rekord növbəti hər matçda yenilənə biləcək.
Qeyd edək ki, “Qarabağ” – “Omoniya” matçı saat 21:45-də başlayacaq. (Apasport)
